Strong Schools werk saam met Vriende van Afrikaans (VVA) om ongeletterdheid hok te slaan
Geletterdheid is die vermoë om te lees en te skryf en die geskrewe woord te verstaan. Daar is ernstige gevolge vir ‘n kind wat sukkel om te lees. Dis onvermydelik: ‘n swak leser is ‘n sukkelende leerder.
Ons is almal deeglik daarvan bewus dat hierdie ‘n groot uitdaging is wat ons skole in die gesig staar.
Cheraldine van der Merwe, van Vriende Van Afrikaans (VVA), ‘n divisie van die ATKV, en Dokka Swart van Doen en Leer beywer hule daarvoor om die belangrikheid en liefde vir lees by mense aan te wakker.
Cheraldine en Dokka het op 10 en 11 November twee van ons Support Hub skole, Sir Lowry’s Pass Primêre skool en Dr .G.J. Joubert Primêre skool besoek. Temperance Town Primêr en Rusthof Laerskool het ook dié geleenthede bygewoon.
Cheraldine het die belangrikheid daarvan om vir kinders voor te lees benadruk en ‘n insiggewende praatjie gegee oor die statistiek rondom leesvaardighede.
By hierdie geleenthede het Dokka verduidelik hoe belangrik ritme en balans vir kinders se leesontwikkelling is. Sy het gedemonstreer hoe hul Doen en Leer program kinders met lees- en leer uitdagings kan help. Die program fokus letterlik daarop om kinders woordjie vir woordjie, met prentjies en aksies te leer lees.
Hier demonstreer Dokka die metodiek van die leesprogram met ‘n groepie leerders van Sir Lowry’s Pas Primêre skool.
VVA het leestrommels ter waarde van R8 500 elk aan 3 van die skole geskenk. Dié trommels is propvol pragtige Afrikaanse boeke en opvoedkundige speletjies.
‘n Groot behoefte bestaan nou om die Doen en Lees programme en die opleiding hiervoor by ons skole uit te kry. Befondsing word benodig vir opleiding en om die program aan te koop. Indien jy wil betrokke raak en ook as vrywilliger wil aanmeld om kinders te help lees, kan jy vir Annette Botha kontak by strongschoolsza@gmail.com, of skakel 072 1899 360.
Annette Botha
Strong Schools Community Collaborative Administrator
E-pos: strongschoolsza@gmail.com
Skakel: 072 1899 360
